مجوهرات: روبيرتو كوين, ملابس: هارفي نيكولز كويت, شعر: ID Beauty Refinery, مكياج: سارة الشطي
بأداء مميز و طلة حلوة، قدرت ليلى عبد الله أن تحتل مكانها في قلوب المشاهدين، مقدمةً أدواراً متنوعة تعكس نضجها الفني وتطور مسيرتها. من الشاشة إلى عالم الموضة والجمال، أصبحت ليلى رمزاً للأناقة العصرية والأنوثة الراقية، حيث خطفت الأنظار بإطلالاتها المتميزة التي تعكس شخصيتها القوية والمتجددة.
في حوار خاص مع عود، تكشف ليلى عن أسرار نجاحها، و شلون توازن بين حياتها المهنية والشخصية، و تشاركنا بعد رؤيتها للموضة والجمال، وأبرز المحطات التي شكلت مسيرتها الفنية.
بصفتك ممثلة وأيقونة في عالم الموضة، شنو اهوه روتين العناية الشخصية المثالي حقك؟ و شلون توازنين وتخصصين وقت حق نفسك وسط جدولك المزدحم بالسفر والظهور الإعلامي؟
أحاول كثر ما أقدر إني أنظم وقتي في الشغل عادةً بين التلفزيون، والتصوير، والسوشال ميديا، ما عندي روتين صارم، أحاول إني آخذ وقتي بكل شي وأرتب جدولي، وأتأقلم على المواعيد والأعمال المطلوبة مني.
بس عندي أكيد روتيني المعين اللي احبه أول ما أقعد آخذ My Supplements، أروح النادي، أكتب ثلاث إلى خمس أشياء أنا ممتنة لها، لما أرجع من شغلي بعد ما أخلص أسوي Breathing أتسبح.
حسب الموجود، وحسب اللي أقدر عليه ما أضغط على نفسي.
هل فيه دور معين أو مشروع كان له معنى خاص بالنسبة لك أو علّمك شيئًا مختلفًا عن نفسك؟
كل دور وكل تجربة علمتني شي، أحياناً مو الدور، تجربة التصوير اهي الي تعلمني الصبر، تعلمني شلون أتعايش تحت الضغط، وهذه مهارة جديدة اكتسبتها. ومرات أشوف الشخصية اللي أنا قاعدة أسويها عندها شي بشخصيتها، أو مبدأ يشبهني و أتمنى أتبناه.
شنو اهي المبادئ أو العادات اللي تعتمدين عليها واللي ساعدتك على النجاح في حياتك المهنية والشخصية؟
اني أحب اللي اسويه، الشي اللي أحس إنه ما يشبهني أو بعيد عن شخصيتي ما اسويه. وأعطي كل شخص شغله ما أتدخل بشغل أحد، أشرف من بعيد فقط.
لازم الشخص يسعى، ويجرب، بدون ما يكون عنده خوف من المخاطر والفشل، وأنا ما كان عندي طول الوقت خوف من الفشل بالعكس أحب أجرب.
بإعتبارك مصدر إلهام حق وايد ناس بأسلوبك، من وين تستمدين إلهامك الخاص في الموضة، سواء تحت الأضواء أو بعيدًا عنها؟
صراحةً ما عندي مصدر إلهام ثابت، أي امرأة أشوفها بحياتي أستمد إلهامي منها سواء بالشغل، بالموضة، بكل شي.
اوصفيلنا أسلوبك الشخصي؟ و شلون يتماشى مع نمط حياتك وقيمك؟
أسلوبي الشخصي يتماشى مع وضعي الحالي، بالتصوير، بالسفر. بس عندي روتيني المعين، أحب أسوي رياضة، أتناول طعام مفيد وصحي، أكتشف شي جديد. أنا إنسانة جداً مرنة، تعلمت المرونة، وهي أكثر شي خلتني أتغير.
شنو اللحظة في حياتك اللي حسيتي فيها بقوة حقيقية أو امتلكتِ فيها الثقة لتقبّل دور أو موقف مليء بالتحديات؟
في وايد محطات، لكن محطتي الأولى كانت لما سكرت تلفوني، وكان أول يوم أصور فيه وأصير فيه ممثلة، وما استأذنت من أحد، لكن كنت عارفة إني أبي أحقق حلمي. اللحظة الثانية، بأي بي توكس لما طلعت واتكلمت وقلت كل شي.
أنا إنسانة أحب أتحدى نفسي، كل مرة أبي أجازف بخطوة، ممكن تكون بالنسبة للبعض تخرع أو مجازفة أو جرأة بس أنا أحب هذي التحديات.
الشهرة مليئة بالبريق لكن فيها بعد تحديات. شنو الشي اللي ما يفهمونه معظم الناس عن كونك شخصية عامة؟
تحديات الشهرة وإنك تكون محط الأنظار والكل يراقب تصرفاتك وخصوصاً من عمر صغير. أنا بدأت بالتمثيل بعمر 14 سنة ودخلت الوسط الفني في سن المراهقة، السن اللي كان مليء بالأخطاء، والأفخاخ، والعثرات.
كطفل عادي عنده أمه وأبوه بس اللي يعاقبونه ويحاسبونه، أنا كان العالم كلا يعاقبني ويحاسبني على أخطائي، العالم كلا يعلمني ويفهمني شنو الصح وشنو الغلط فكان في تشتت.
الحين أتفهم كشخص مشهور ممكن الكل يحاسبك، ولكن التحدي شلون نكون واثقين من أنفسنا ومو أي كلمة تهزنا.
اللي ما يعرفونه الناس عني، أنا أحب الفن والتمثيل بس الشهرة مرات تزعجني، ولكن الحمدلله مرات في لها إيجابيات.
لو حصلتي الفرصة انك تسوين خط أزياء مستوحى من أحد الشخصيات التي قمتِ بتأديتها، شلون بيكون شكله؟ و شنو الرسالة اللي تبين توصلينها من خلاله؟
رح ادمج فيها كذا شخصية، مو شخصية وحدة. رح أدمج شي أنا سويته بساهر الليل تو بالثمانينات مع شي مودرن. رح اسوي لاين ستريت ستايل بس فنتج، قديم مع جديد. وايد أحب الفاشن عموماً، أحب كل القطع الحلوة.
كدور كل أدواري مختلفة، بس لو أدمجهم ممكن يطلع شي حلو.
اللي أبي أعبر عنه في خط الأزياء الخاص بي لو سويته إنه كل بنت تقدر تلبس اللي تبيه، تلبس اللي يريحها. ويكون يتكلم عن الشخصية البولد القوية. بنفس الوقت يكون لبس يناسب الهاوس وايف والسي إي.
معجبينك يحبون يستلهمون منك. شنو النصيحة اللي تقدمينها للشباب اللي ودهم يعبرون عن أنفسهم من خلال الموضة؟
أول شي إنت حلو بكل شي، بشكلك بوزنك بطولك بأي شي مميز فيك، كلنا نوصل لوقت نتعلم ونعرف نفسنا ونفتخر بأشيائنا والتفاصيل الموجودة فينا.
الفاشن مو لناس معينة فقط هو حق كل الناس، وتقدر تعبر عن هويتك وعن شخصيتك من خلال لبسك. استثمرو بالقطع الحلوة المفيدة اللي ممكن تدوم معاكم لوقت أطول.
تركتي بصمة حلوة في التمثيل والموضة من سن صغيرة. شلون تبين الناس تذكرك بهالمجالين؟
الصراحة السؤال وايد صعب، خطتي اللي في بالي الحين إني أبي ألهم عدد كبير من البنات، شلون يعتمدون على نفسهم ويكونون واثقين من أنفسهم ويحبون نفسهم بأي شكل، ويكونون أقوياء. وبالتمثيل ودي أمثل دور كل امرأة، وأوصل صوتهم حق كل العالم.
برأيك، شنو اهي الصفات اللي لازم تكون موجودة عند الشخص عشان يحقق النجاح في هذه الصناعة؟
الجرأة أو القوة في أخذ القرار يعني إنك تكون واثق من نفسك، وعارف متى تاخذ الخطوة المناسبة. في فرصة تجينا مرة وحدة وممكن ما تتكرر لازم تكون عارف متى تغتنم الفرصة، مركز وتحب شغلك مهما كان متعب، ومهما كان يبعدك عن أصدقاءك، أو عن حياتك.
إذا رجع فيك الزمن إلى بداية مشوارك، شنو النصيحة اللي توجهينها لنفسك الشابة حول كيفية التعامل مع عالم الترفيه؟
النصيحة اللي كنت راح اقدمها حق نفسي في بداياتي إني ما أتأثر بأي تنمر، ولا بأي تعليق يحبطني، وأركز على شغلي أكثر. ما ألوم نفسي لأني سويت اللي أنا أقدر علي، أنا جداً فخورة بنفسي.
